عندى كبار للشاعر على الكيلانى

عندي كبار تقوللّي شن درت .. وعندي صغار تقوللي كيف صار

تكبَر اتكبّر هلَك كان أكبرت .. بفعلك يظلّوا فالعيون أكبار

ماتقول فالميعاد درت ودرت .. خلهَا الناس اتقول شنهو دار

لاتنتفخ عالناس لو أنشكرت .. يندىَ ولَد لَجواد من لَفخار

لاتقول حاصل لاأتقول عبَرت .. ولا تظلّ ديما ناقلك تيّار

لاتقول رابح لاتقول خسَرت .. إيجيك بومغازة قاصدك ميّار

لاتقول عاجز لاتقول قدَرت .. ولاتقول عدمَن والايام عشار

ولاتقول طاب العون كان أبحَرت .. ياك فى دقيقة يقلبَك تيّار

ولاتقول عظمِي صبّ لا أنكسَرت .. العظم المدشـّش يلحمه جبّار

لاتقول فارس خيل لاديّرت .. يدور الفلَك تحتاج لِـبوحمار

لاتقول راقي لاتقول حدَرت .. لاتقول عافي للزمان ودار

قولّـه امقدّر ماتقول أخترت .. اللي قالّك فى الهمّ ماتختار

لاتقول فوق الريح لاأنفقرت .. وأضحك على الملّيم والمليار

قبـّل لوجه الله كان احترت .. اللي متّكل على الله ماينهار .