قصيدة نهار الشيلة"

بدأ هذه القصيدة الشاعر صالح التاعب وسببها أن من كان يحبها رحلت وزوجوها من غيره، وجاء إلي ديارها فلم يجد أحد فجلس على الأطلال، وقال هذة القصيدة وطلب من شاعرنا عبد الرحمن امغيب أن يرد عليها.

قال صالح التاعب:

عندي عقل موقاعد نهار الشيله
عليه حايلوا مابت اتجيبه حيله
كثر تخميمه
والعين ضاله تذرف عليهم ديما
كيف نجبدوا مدعى كبير القيمه
نحوس ف العداله نين نا نمشيله
بعدوه عليا
بودور جبا كي نخيل زويه
اللي ف الجبل ماهناك واحد زيه
نهار شيلة الغالي عليّ ثقيله
باعدوا وتمرد
نعنه ثقيل وم الغلم يجرد
ونعنه علي مرقد سرير مفرد
ويوم الزياره جوزته تمشيله
ياشيخ بوالحلافي *
جدك شريف وراك مسلم صافي
يامن عطى ريدي نعنه هافي
ولكن لسانه ساعة التسبيله
ياشيخ بو بجوده
جدك شريف امنسبات اجدوده
يامن عطوا ريدي نظيف اخدوده
نعنهم فقارى في حياه رذيله
ياراقد الصليبه
وياعيت صلمه كلكم جمليه
نعن صدافهم بطاح طافي ضيه
ويبقوا شماوي ع التراب دقيله
ياغفير القطه
نريدك تثور معاي لاتبطا
اللي باعدوا ريدي مغير بخطه
نعنه جنازه والكفن واتيله
يابومغيب هابه
علي باعدوا مولى القرين الصابه
ان ما طلت بو سالف يدير ضبابه
يبقن ظروفي عندهن تمييله
عندي العقل موقاعد نهار الشيله
عليه حايلوا مابت اتجيبه حيله


--------------------------------------------------------------------------------

* يقصد المرحوم حسين لحلافي




رد شاعرنا عبد الرحمن امغيب على الشاعرصالح بو التاعب في قصيدتة نهار الشيله قال:

عندي العقل موقاعد نهار الشيله .. عليه حايلو مابت اتجيبه حيله
مانفعت فيه ادباره .. عقلي بعد شيلة كحيل انظاره
مولى الشفاه امعورجه بشطاره .. حوس مدار العقل بوتكليله
اللي مضحكه لاسعفه لا نصفاره .. سبحان ما خلق مولاي في تعديله
سبحان كيف انسيني .. وكيف ايش نامت في غايبه عيني
ياريت لاريتك ولاريتيني .. ولاصار باب الحب يا الجميله
ايام كان الغلا متموم كان ايجيني .. ويزعل علي كيف ما نمشيله
واليوم الغلا مولول .. جابر علينا والحدود امحول
تبعت هللي ف الخراب يعول .. خانك الله يابو نفايل نيله
يا ما زها صوبه وخيره طول .. وياما جرى شوري بكل وسيله
ريدك انساه سريبه .. وخلي العقل يرد في ترتيبه
الخونه بعد لامان هي العطيبه .. ومن صاحبك تقبى عليك ثقيله
يا بو التاعب راك عاد تدويبه .. من حاشن انسيك انساه عطبك ليله
وانسى كحيل هماده .. وانسى الغلا كي نسوته وزياده
نعدوه كي هللي حذا قرناده .. خربن مواكينه بعد تعديله
ستين واحد دفنوا بشهاده .. ولي عاش منهم في حياه رذيله [1]
نعدوه كي البلغاري [2] .. اللي شايل الحجاج مو متواري
جوه الصحافه تاعبين سواري .. لقيو حطامها ع الوطاه دقيله
ولقيوا اللي مجروح دمه جاري .. ولقيوا اللي واتي ع التغسيله
نعدوا كحيل ارماقه .. فراسين قطعوا في نهار ملاقه
خان الغلا وانت تعد فراقه .. كي ماجرى ف المرج وايش اطريله [3]
انسى بوخجل مبروم بو زراقه .. ونا زاد نقني عزم ع التطويله
نعدوا كحيل انظاره .. فراسين قطعوا في نهار القاره [4]
عيت جبر ومعاهم ضنا نواره .. ولقيو الورفلي [5] مدني خيله
ومعاه الحسون ويوم توقد ناره .. وكله علي سبا ضنا الخويله
نهار العدو تمت الخيل سكارى .. اللي حضروهما قدروا علي تمثيله
تلاقوا اصحاب المال والغواره .. حادرين من سيوه وثاني ليله
وواجد اللي جاب الثنا وافخاره .. وواجد اللي استنزل ع الترجيله
نعدو كحيل اصبيه .. نعدوه كي ما صار ف العامريه [6]
شنقوا نهار السوق في ضحويه .. وسرافين يطروا فيه مو في جيله
ثلاثه سعادي في سباب وليه .. علي شهادتي لاحق لله تبديله
عندي العقل مو قاعد نهار الشيله .. عليه حايلو ومابت اتجيبه حيله
يا بو التاعب حطه .. حملك ثقيل وبو مغيب شطه
سمعتك اتفزع في غفير القطه .. ونا زاد نفزعلك بشيخ مثيله
ياراقد الحمام لا تبطا .. وحتى الحمري ماعطيب اعويله
يابو التاعب زره .. ولكن ادعي بشويش راك اتضره
مغير قول في بيتك وفي اللي بره .. ومغير قول ف الصحه وفي العويله
ومغير قول في بوها وخوها مره .. ومغير قول تقبى قزن وهجيجيله
مغير قول في مينتا .. ومغير قول ف الشايب وفي خيوتا
ومغير قول تمرض تنقرض حالتا .. ومرضها يجاور ما تجيبه حيله
ومغير قول راجلها يموت ايمتى .. وراك تظلمه مولى النفايل نيله
يا بو التاعب واتي .. كيف تنزنق واصحى تسيلب وصاتي
راني غريب شوي موش مواتي .. والناس تنقله ساع الكلام اتشيله
وان كنك تريد اتسال عن جيهاتي .. راني عللي صنقري القبيله
ونختم كلامي ع النبي بصلاتي .. شفيع امته وقتن تقل الحياه
عندي العقل موقاعد نهار الشيله .. عليه حايلو مابت اتجيبه حيله


--------------------------------------------------------------------------------

[1] يقصد الستين الذين توفاهم الله في حادث طائرة الحجيج البلغاريه والتي سقطت في السبعينات في منطفقة قرناده بالجبل الاخضر.
[2] الطائرة البلغارية.
[3] يقصد زلازال المرج في شهر رمضان 1963م.
[4] نهار القاره:موقعه شهيره جرت بين اولاد علي وبين الحسون القادمين من الغرب يغيرون على ابلهم وقد قال احد الشعراء فيها:
يوم ملاقاهم ف القاره
يوما شين تلهب ناره
لكن ما فازن بدباره
تمن هم والخيل غماره
[5] الورفلي- رجل من الغرب كان في المعركة ضمن الحسون وكان كلما اطلق رصاصه على واحد من اولاد علي يقول: (خدها وولي م الورفلي) وكان من ضمن اولاد علي مقاتل من قبيلة الشتور وكان فازع معهم واسمه قنيعير.
وكان قصيرا لايخطيئ هدفه وخدع الورفلي بان وضع طاقيته على راس ناقه ميته فاطلق الورفلي رصاصة فحدد قنيعير هدفه واصابه وقال خينها: دلك يا طير شط اقنيعير فلما قتل الورفلي انهزم المغيرون.
[6] العامريه مدينة قرب الاسكندرية اغلب سكانها من اولاد علي.